D Generalversammlig findet das Joor im e bsundere Raame statt. Die detaillierti Yylaadig Generalversammlig < < findsch do!
WICHTIG!
Me muess sich bym Obmaa fir d GV unter meymai@bluewin.ch oder per SMS an 079 320 26 16 unbedingt aamälde!
D Generalversammlig het das Joor am e bsundere Ort und im e bsundere Rahme stattgfunde.
Die Maischte hänn im Pello sy Humorlabor und L&L Kitchen (Layla & Louis) im Santihans an dr Fatiostrooss nit kennt und ab däm scheene liebevoll und praktisch yygrichtete Saal gstuunt.
Unsere Oobmaa Peter Meyer het vor dr Generalversammlig dr Apéro e so ereffnet:
Syt junge Joore fyyri ych nur in de Schnapszaalejoor mit eme Fescht my Gebuurtsdaag. Ych wiird das Joor nit 77, aber in 44 Daag darf ych my 70-zigschts Juubeljoor fyyre. E soo bi ych zwar nit em 11-jeerige Jooresrythmus, aber dr Schnapszaal treu blyybe! Drum freuts mi ganz bsunders, dass ych eych passyve und aggtyve Altgardischte und dr Rumpeloobmaa Martin Cron deerf yylaade. Au dr Georges Fünfschilling dr Oobmaa vo de letschte Glieebiirli wär yyglaade gsi. Är het sich laider kurzfrischtig uus gsundhaitlige Grind miesse entschuldige.
Dr Vize-Obmaa Kurt Keller, het wie allewyyl uff syni humorigi Art im Namme vo de Aawääsende im Peter syni groosszigigi Scheste rächt häärzlig verdanggt.
No em Apéro het dr Humorlaborant Pello s Vor-GV-Programm eröffnet. Do e baar Impressioone derzue:
E weeneli verspötet het denn dr Obmaa Peter Peter Meyer die 28. ordentligi Generalversammlig vo dr Wettstai Alti Garde mit dr spezielle Begriessig vom Stammobmaa Pius Keller, em Rumpelobmaa Martin Cron, em Eereobmaa Richi Peyer und Eermitgliied Wolfgang Schurter eröffnet. Enttüschd hänn ihn die vyyle Absaagende, wo sich entschuldigend hänn, will är uus syner Sicht zenere spezielle GV yyglaade het. Dur d Generalversammlig het är mit e baar kürzere und längere Unterbrächige gfiert. E so het isch vermiide woorde, dass em Louis die verschiiedene Menuegäng verkocht sinn und d Layla die wunderbar aagrichtete Däller mit eme hervorragende Ässe druff het kenne zwischdure serviere. Es isch e tolli GV gsi und im Aaschluss an offizielle Dail het me no d Frindschaft pflägt. Do no e baar Impressione vom offizielle Dail.
S Protokoll wo in därre PDF > > GV Protokoll 2016 findsch, het dr Schryyber Heinz Grolimund zem letschte Mool verfasst!