Sunntig, 14. Hornig 2016, 17.30h im Hööfli vo dr Rumpelstuube
Dr Obmaa vo de Rumpler stellt by dr Begriessig zer Ladäärnevernissage fescht, dass es in dr iiber 90-zig jeerige Gschicht vo dr Rumpel Clique 1923 erscht s dritte Mool isch, dass s Ladäärne yypfyffe mit em Valentinsdaag zämme fallt. Jetzt isch au glaar an wär die vyyle Mimoosebluemestrüss verdailt wäärde. D Rumpler mien e scheens schlächts Gwisse ka ha, um e so by iire Daame dr Dampf abzlosse!
No dr Valentinsdaagepisoode isch me denn zer Sach ko. Verdienschtvolli Rumpler sinn vom Obmaa geert woorde. Derno het dr Fritz Peter dr Zeedel voorglääse. Denn isch mit dr Stäggeiibergoob vom Obmaa d Cliquefierig fiir d Fasnachtszyt an Dambuurmaioor iibergange. Zem Schluss het me d Vehüllig vo dr Ladäärne zooge und em Megge sy Brachtslambbe präsentiert. Ungwoont fir d Wettstainlemer Alt-gardischte isch gsi, dass me nüt gheert het, wie s zer Entsteeig vo dr Ladäärne ko isch! D Brigitta vo de Gliebiire het die Aawääsende mit Wyssem und Sunnereedli – vo de Rumpler offeriert – beschtens bedient.
Als Abschluss vo dr Vernissage het me no dr Wettstaimarsch intoniert. Derno isch d Ladäärne demontiert, u.a. dur die baide Ladäärnezieer an d Schnyydergass drait und wiider uffbaut woorde. Im Rääge het me d Ladäärne bis zer Mittlere Brugg yypfyffe und denn zer Wettstaifamilie zem Waisehuus brocht.
