Wettstai Summerstamm Alti Garde

Donnschtig, 04. Auguscht 2016, 19.00h
Dräffpunggt z Glaihyynige bym Reschtorant Schiff

E Fierig dur s ehemoolige Fischerdorf

 
mit em Peter Habicht und ere Iiberraschig

Dr Peter Kraus als Aggtyv- und Passyvbyysitzer vo dr Wettstai Alti Garde het dr Peter Habicht wiider ze-nere Fierig kenne gwinne. Me het sich im Reschtorant Schiff z Glaihyynige droffe. Laider het s das Joor nur aimool

gschifft!
Drotzdäm hänn vyyli Mitglieder vom Wettstai Stamm, de Rumpler, de Glieebiire und de Wettstai Alti Garde sich die Fierig under de Räägeschirm nit entnää losse! No in dr gschützte Gaartebaiz vom Reschtorant Schiff het me vom Peter Habicht erfaare, dass sich dä Ort fir d Besiedlig, mit däm fruchtbare Schwemmland, vorallem de fischryyche Gwässer und vo de Hochwasser relativ gschützte Laag uff dr lyycht erhöhte Schwemmlandterrasse, hervorragend gaignet het. S Mündigsgebiet vo dr Wiese isch vor dr Rhybegradigung e Gefieg mit Insle und Sandbängg, mit langsam fliessende saichte Wasserlaif und fir sy Fischryychtum bikannt gsi. D Naase isch dr ryychschti Fischbestand in dr Wiese gsi. Im Joor 1413 isch doorum zwische de Fischer im sällmool no maargggrooflige Glaihyynige und däne uus em Glaibasel sogar e Stryyt urkundlig belegt! Glaihyynige isch au s Weschhuus vo de Basler gsi, will s Wasser vo dr Wiese – im Uurgstai (Granit) vom Schwaarzwald entspringt – drum waicher isch. Die vermeeglige Familie uus em Basler Daig hänn drwääge d Wesch z Glaihyynige vo Fraue wäsche losse!
D Fassademoolerei am Reschtaurant Schiff, wo me bym erschte Halt an dr Dorfstrooss aagluegt het, stamme vom Basler Kinschtler Burkhard Mangold und sinn 1927 gschaffe woorde.
Bym zwaite Halt Egge Dorfstrooss/Neihuusstroos findet me e wyteri Fassade-moolerei mit em Hunnekeenig Attila – em Dorfwoppe vo Glaihyynige. Im reformierte Pfaarhuus vis a vis Egge Dorfstrooss/Pfarrgass isch dr Karl Gustav Jung (1875-1961) uffgwaggse. Är isch e bikannte Schwiizer Psychiachter und Grinder vo dr analytische Psychologie gsi.
Do die erschte Impressioone:

S Zentrum isch hitte no dr Kroneblatz. Dä haisst e so, will do die baide – au z Basel – beriemte Fischbaize Krone und Drei Keenig* gstande sinn (*stoott hitte an dr Glaihyynigeraalaag). E huffe Basler hänn d Sunntigsfamilieuusflüg mit eme Fisch- ässe z Glaihyynige verbunde. D Ändstazioon vo dr Drämlilinie 4 isch scho vor dr Wändi in s 20. Jh. vor dr Krone gsi. Scho denn hets guet bsetzti Drämli gää, wie in dr Neizyt bym Achter! D Industriealisierig fiert zer markante Veränderig vo dr Bevelggerigsstruggtuur. Zwische 1850 und 1900 het sich d Yywohnerzahl verdrei-facht. Uus em Fischerdorf isch e Arbaiterdorf, das zwar grooss woorde, aber wyterhi arm blyybe isch. 1891 het drum Dorfbeheerde zem erschte Mool d Verainigung vo dr Landgmaind mit dr Stadt Basel erwooge. 1893 het Basel d Dorfverwaltig iibernoo und 1908 Glaihyynige yygmaindet. Die no existierende Verain pflääge d Erinnerig an s ehemoolige Dorf. Die stärggschti Veränderig het dr Bau vom Rhyhaafe brocht. Was das ghaisse het, gseet me am Ändi vo dr Schuelgass mit däm gwaltige Iibergang vom Dorf zem Betonsilo mit em Dorfwoppe vom Attila druff.
Do die entsprächende Impressioone:

Vo dr Schuelgass het is dr Peter Habicht wyters um das alti Fischerhuus zer Friedhoofgass hinter d Dorfkirche gfiert. D Dorfkirche isch im dryssigjeerige Grieg zerstört woorde. 1710 isch die hittigi Dorfkirche vo de Basler nei baut woorde, um dr Bevelggerig dr Wääg vo zwaimool 3km z erspaare, will Glaihyynige ze St. Theodor gheert het. Umgekeert het sich dur die groossi Distanz, das eher groobe Buure- und Fischervolgg nur schlächt kontrolliere losse! Dr Standort vo dr friehere Kirche isch nit belegt. Doch wiird uff Grund vonere doggumentierte kuurze Bauzyt vo 4 Monet und de relativ gringe Baukoschte vermuetet, dass die nei Kirche uff de Fundamänt vo dr Alte baut woorde isch! D Kirche isch die ainzigi Baroggkirche im Kanton Basel-Stadt. Als typischs Baroggelemänt kenne lediglig die groosse Fänschter aagluegt wäärde, die zem e liechtdurfluetete Inneruum fiere. Ainzigartig isch d Konstruggzioon vom achteggige Duurm iiber em Koor. S charaggteristische Ziibeledach isch fir d Region au nit typisch! Mit em Yybau vom neie Gloggespiil het me 1910 dr Durm uus Blatzmangel, um wenigi Meter miesse aalipfe. Do am Wiesedamm dr reformierti Gmaindsaal uus Koschtegrind im e Mehrfamiliehuus wyyche muess, entstoot jetzt weschtlig vom Kircheyygang e neie Pavillon mit eme laider glainere Saal.

Bym effne vo dr Kirchediire isch d Iiberraschig im Koor scho baraad gstande – Swiss Mariner Chantyman -. Wäärend zwai Chantys het me d Schifferei e weeneli kenne vergässe.

Vo dr Dorkirche isch s wyters dr Dorfstrooss entlang am Schuelhuus verbyy an d Bonergass vor s Schifferhuus zem Clavelguet gange. Dä im 18. Jh. bauti Landsitz het fimpfmool dr Bsitzer gwäggslet, bivor 1860 dr sälbständigi Syydebandfäärber Alexander Clavel-Lindenmeier en iibernoo het. Dä het 1868 e Analinfabrigg uff em speetere Gländ vo dr Chemie-Industrie-Basel baut. Während d Faarbstofffabrigg 1873 an d Firma Bindschelder & Busch gange und do druus s Chemieundernämme CIBA entstande isch, het Syydebandfäärberei dr Sohn Alexander Clavel-Merian iibernoo. Är isch e wichtige Aarbetgääber woorde. Unter em Clavel-Merian sinn uusdehnti Parggaalaage mit wilde Dier dinne entstande und so au Jagde veranstaltet woorde. In dr Aalaag sinn au zwai Waier gsi, wo uus aim denn e Schwimmbeggi entstande isch. D Glaihyynigerkinder hänn deerfe aimool im Monet drin go baade.
1943 het die hitte nimme existändi Schwiizerischi Reederei AG das Huus kauft und als Schifferhuus fir die anggehende Rhyschiffer und als Schifferkinderhaim gnutzt. Hitte isch s Reschtorant Schifferhuus dinne und d Brivaatschuel academia.
Syt em Johr 2000 stoot nääbedraa s reschtaurierti, wiideruffbaute Fischerhuus Bürgin. Ab 1690 ka me d Fischerfamilie Bürgin noowyyse, wo iiber Generazioone d Dradizioon vom Fischerbruef noogläbt het. 1764/1765 isch s Fischerhuus an dr Schuelgass baut und 1804 e Stall mit Schyyre aabaut woorde. Dur d Industrialisierig isch s Fischerhuus vom Abbruch bedroht gsi. 1999 isch d Stiftig pro Fischerhuus Schuelgass 27 grindet woorde. Dangg dr Spänd vo rund 800’00 Frangge het me das Fischerhuus kenne rette und an jetzige Standort bym Clavelguet versetze!

Egge Bonergass und Wylerwääg isch d Fiehrig vom Peter Habicht im Rääge wyters gange, wie me däm Video ka entnää!

Vom Schifferhuus isch s in Wylerwääg iiber Glaihyynigeraalaag an Egge Wylerwääg/Schäferwääg gange. Deert het dr Peter Habicht uff die ehemoolige geophysikalische Bohrige hiigwyyse. *Dä Bohrduurm uff em Areal vom Wärgghoof Glaihyynige vo de IWB Basel, uffgnoo am Zyschtig, 16. Jänner 2007 gheert zem Energieforschigsbrojäggt Deep Heat Mining. Dr Bau vo däre Pilotaalaag fir e geothermischs Graftwäärgg no em Hot-Fractured-Rock-Verfahre hätt e umwält-verdräägligi Energiegwinnig ermeeglige solle! An däm Zyschtig Moorge um 01.09h isch e Äärdbeebe mit dr Steerggi 3,2 mit em Epizentrum nääbem Bohrloch registriert woorde. Das het zem Abbruch vo däm Versuech und ze Schnitzelbängg an dr Fasnacht gfiehrt!
Es beebt, es zitteret und es gracht
und ganz Basel isch verwacht.
Do stuunt d Frau Schneider ganz verschreggt:
„Sovyyl han ych no nie beweggt!“
Bsunders gfalle dien am Schäferwääg d Arbaiterraihehüüser und d Schichtfiehrer-hüüser mit de Gmainschaftsgäärte.

Zem Schluss isch me vor em FCB-Graane bym Haafebeggi II in Seemannskäller abdaucht. Drogge isch niemerts blyybe! Will halt nur e Schlummerdrungg bstellt woorde isch, hänn aber d Määge aafoo gnuure. E baar Keerbli Chips und Salzstängeli sinn denn doch no uffgfaare woorde. Das het d Swiss Mariners derzue verlaite losse allewyyl dr erschti bis dritti Gang aazkinde!
Mit ihre Chantys acapella gsunge, hänn in däm Ambiente under em Säägel vom Seemannskäller d Swiss Mariners u.a. mit em Chanty „Drunken Sailor“ fir e tolli Stimmig gsorgt! Wie me uus de abschliessende Fotigalerie und de Video ka entnää het alles basst!

E groosse Dangg an alli wo eppis ze däm glungene fiechte Altgardesummerstamm byydrait hänn.
Das es gfalle het zaigt dr Inhalt vom Griene Blätzli sym Dangges-Email vom Frytig, 05. Auguscht 2016:
Liebi „Altgardischte und Kollege“! Ich ha Euch au uf däm Wäg noomool ganz härzlig fir d Yiladig und dä „saugueti“ Summerstamm welle dangge. D Idee “ uf Klaihiinige z goo“ isch toll gsi und der Habicht het das wiider glunge gmacht. D Chanty-Singers hän mi aimool mee total begaischteret – e Supertruppe!  Vo de vyile Mitgliider vom Stamm wo derby gsi sin ha ych nur guets gheert und die wo nit koo sin hän ebbis verpasst! Also – mercie und e liebe Cliquegruess Hanspi