Am Donnschtig, 1. Juni 2017
isch vis à vis vom Badische Bahnhof am viertel vor Fimpfi d Besammlig gsii. D Brigitta und dr Kurt hänn dr Aaloss organisiert und uns im Car begriesst. D Brigitta het no e weeneli mit eme Jetlag kämpft, will sii erscht am Daag vorhär uus Australie zrugg ko isch. S Carunternämmer Stiefvater het uns zem Wyyguet Zimmermann in Schliengen aanegfiert.
Deert het me während dr Wyydeguschtazioon de baide Juubilare zem runde Gebuurtsdaag gratuliert und fir iire Aadail an dä Aaloss danggt. Bivoor me uff d Wanderig ze de Spaarse uff Hertingen gange sinn, isch e Flaischblättli serviert woorde. Zer Deguschtazioon het dr Karl-Ernst Zimmermann mit ere groosse Begaischterig iiber sy Wyyguet verzellt. So het me erfahre, dass är im Markgräflerland mit syne Wyy im Yygglang mit dr Natur e hoochi Qualität aasträbt. Uff däre Basis produziert är in zwaiter Generazioon syni Wyy, vo däne jeede ainzelne dur sy perseenlige Aigeaart bräägt isch. Die Wyy, aber au die Wyyschänggi ka me nur wyter empfähle.
Derno sinn dr grooss Dail uff Hertingen gwanderet und die andere hänn sich mit em Car fahre loss. Yygangs Hertingen am e Ströössli mit em Namme „Im Rumpel“ sinn mir Wanderer vo de
Carfahrende mit Schämpis empfange woorde. Ze Ehre vo de Jubilaare und dr Stroossebezaichnig isch no mit em Wettstaimarsch e Ständeli abghalte woorde.
No däm kuurze Zwischehalt sinn mr im Reschtorant „Rössle“ zem Spaarseäse yykehrt. In und an däm Huus het dr Johann Peter Hebel syni Spuure hinterlosse. Es isch e gmiegtlige und frindschaftspfläägende Aaloss gsii. Vyyle Dangg fir d Organisazioon an d Brigitta und an Kurt!
