Sunntig, 06. Meerze 2016, 10.00h,
Besammligsort Busaahalteblatz Gaartestrooss,
Detailaagoobe findsch uff däre PDF > >Yylaadig F-Bummel 2016
Daas Joor isch das mit em Dräffpunggt und em Car noonemool anderscht. Dr Dräffpunggt isch an dr Gaartestrooss by de Car- oder Busaahalteblätz und als Iiberraschig het dr Fuehrhalter Rast e Super-Car mit zwai Etaage aanestelle losse. Ändlig emool eppis Neys am Fasnachtsbummel, wenns au numme s gmainsaame Aanefaare in aim Car isch.
Schlussändlig sinn mir jo glyych wiider uff Colmar an Place de Rapp gfaare. D Rumpler zem 56-zigschte -e hundskomuuni Zaal, nit zem juuble-, d Glieebiire und Wettstai Clique Alti Garde je zem fimfte Mool hinterenander, au nit zem juuble!!!
Derno sinn mir vom Place de Rapp zem Maison de la Ville gässlet …
… und vom Maitre Iff Muller begriesst woorde.
Dr Rumpel-Obmaa Jürg Mühlberg het sich bedanggt. No de obligate iiberraschend kuurze Reede und em Apéro mit Gwiirztraminer und Guggelhopf -dr Schlyffer het e baar „canettle bière“ fir sich organisiert-, hänn d Pfyffer no als Dangg dr Wettstaimarsch bloose.
Derno sinn mir wyters zem Reschtorant Meistermann gässlet, wo mir seer guet diniert hänn.
Zwische de ainzelne Gäng hänn d Obmanne das Joor vyyl weniger zsaage ka.
Erwäänenswärt isch dr Georges Fünfschilling vo de Glieebiire. Är het die, wo unaigenützig im Hintergrund schaffe, in synere Danggesreed nit vergässe und mit yygschlosse. Au no Beyydruggt het syni Uusaag, dass är in de letschte fimf Joor, syt mir zämme uff d Gass geen, eppe 50 Frinde gfunde het.
Zwiischeyyne het is no dr Rumpel-Waggis d Fasnachtslevite under d Naase gryybe.
Au dr Obmaa vo dr Wettstai Alti Garde het no wie allwyyl au no eppis miesse loos wärde.
Yygschlaage het dr Peperoni mit syne Schnitzelbängg. Bsunders die Intäärne sinn gsässe.
Do findsch dr > > Peperoni Bummel Schnitzelbangg 2016
No em uusgiibige Fasnachtsbummelfeschtmool isch me yygstande und dur d Altstadt vo Colmar gässlet. D Lyt eb Yyhaimischi oder Bsuecher hänn in de Gasse Byyfall glatscht und vyyl gfettelet. An dr Lauch by de Baize im Petite Venise hänn mir dr Halt gmacht und iiber mänggs scho wiider kenne lache, gäll Rolf B.
Vom Petite Venise sinn mr dr Lauch entlang dur e glains Diirli ainzeln in e haimelige Hinterhoof ko.
Denn sinn mir mit eme kuurze Zwischehalt bym Miinschter vo Colmar wyters zum Car gässlet.
Zrugg in Basel sinn mr dr Spaalebäärg ab zem e Zwischehalt uff em Seibi -Rio Bar- …
… und derno via Strytgass uff d Paradestreggi in d Freie yybooge.
An dr Schiffländi hänn mr noonemool e Halt im Stadtkäller gmacht.
Sisch no gräftig gässlet woorde. Im Pfäffergässli isch d Fasnacht und dr Bummel 2016 mit em Wettstaimarsch e letschts Mool verabschiidet woorde!
Im Rumpelkäller het no dr Dambuurmaioor dr Stägge em Obmaa dratizionell zrugg gä und e so isch dä Bummelsunntig 2016 mit eme Schlummerdrungg z Änd gange.
