Wie allewyyl isch me am Moorge vor de Vieri an dr Yysegass als Wettstaifamilie zämme mit de Knorzi und em Stamm yygstande. Do die Alti Garde kai aigeni Ladäärne me het – me het nur no Aini zämme mit de Partner – isch die an dr Huetgass by de Rumpler und Glieebiire gstande. Mit em Vierigloggeschlaag het dr Thomas Schürch dr Morgestraich aagsait >VCfg1o_yniOEy96f (laider het das Video kai Doon).
Me isch zämme iiber Määrt, d Freie uff in d Strytgass und denn in die Wyssi Gass abbooge zem erschte Halt.
Do dr Megge die Ladäärne gmoolt het isch är logischerwyys hinter synere Ladäärne yygstande. S het au no anderi Wettstainlemer hinder dr Ladäärne ka, wo aber ze däre nüt bydrait hänn!
Dr Stamm isch denn mit de Knorzi no e Rundi wyters. Die Alti het sich scho dratitionell mit de Partner im Hans Huebersaal droffe. Deert het dr Dambuurmaioor vo de Rumpler wie allewyyl Määlsuppe, Ziibele- und Kääswaie offeriert. E ganz grosses Dangerscheen (la la, la la. – sisch diggi Boscht, sich Dambuurmaioorboscht!)
Denn sinn die alti Garde mit de Rumpler und Glieebiire wyterszooge bis zem Daa-gesaabruch. S Zmoorge het me im Stadthoof yygnoo und isch denn dr Spale- und Noodlebäärg zer Harmonie, via Obere Heu- und Gämsbäärg, Schnabelgass, Gäärbergässli, Seibi und Kunschtheeli bis am zwelfi Zmidaag go gässle.
In dr Kunschthalle isch no e Apéro gspändet woorde – vyyle Dangg em Spänder -, …
… bivor me in d Rumpelstuube isch go Zmidaag ässe!