E Bricht vom Seggelmaischter und Vordrääbler Christoph Oertli
Samschtig 3. Juni 2017
By scheenem Wätter hänn sich dryzää Rumpler und ai WAG-ler an dr Gaarteschtrooss droffe und sinn mit em Glaibus-Pilot Jean-Michel Richtig Markgräfler-Land gstaartet. Non ere kurze Faart sinn mir vo de Gaschtgääber Fridi und Ruedi Jäggi in yyrem Schwalbenäscht zmitts im Buuredorf Liel begriesst worde. Unterem lauschige Epfelbaum hänn mr deerfe zarts Suppeflaisch und Gnochemargg gniesse, wo vier Stund in dr Suppe köchelet het. S Schwalbenäscht isch dr Landsitz vom Ruedi, wo är in zwanzig Joor in sinnere praktische Art renoviert und ussbaut het.
Frisch gstärggt hänn mir e loggeri Wanderig unter d Fiess gnoo und sinn im Noochber-Dorf Schlienge in d Groone no rächtzyttig vor em Rääge zem Spaarse ässe yydroffe. Will mr Alli alli Spaarse, Schyyfeli, Maionese, Hollandese und Grazete leer butzt hänn, isch es dr Räscht vom Daag drogge blyybe. Fir die wo noni gnueg vo de Spaarse ghaa hänn, isch d Meegligkeit gsi am obligate Halt bim Fritz Wassmer in Bad Krozige sich no entschprächend z versoorge. Als Abschluss het s none Bier oder e Saft bim Stauwehr am Rhy gää.
Härzligge Dangg an Jean-Michel, wo uns sicher wiider hai brocht het und an Organisator und Gaschtgääber Ruedi Jäggi.
Christoph Oertli