S goot mit de Rumpler und Glieebiire an s Win-zerfescht uff Lutry.
Detail ka me däre PDF entnää > > > Lutry 2015
Fête des Vendanges in Lutry 26. und 27. Sebdämber 2015
Dr Bricht vom Schryyber Heinz Grolimund
Mit ere Delegation vo 40 Vorträbler, Pfyffer/-inne und Dambuure, zämmegsetzt us Mitgliider vo 7 Fasnachtsclique/-grubbe, hänn mir am Fête des Vendanges im hischtorische Stedtli Lutry im schöne Lavaux am Lac Léman dailgnoo.
Das Aerntefescht findet jedes Joor am letschte Wuchenänd im Sepdämber statt und isch s wichtigscht Ereignis im Jooreskaländer vo Lutry. Am Frytig und Samschtig finde im Dorf divärsi Aggtivideete, Konzärt und Spiil statt und am Sunntig denne en Umzug mit rund 650 Schielerinne und Schieler vo Lutry und Paudex. Die ainzelne Schuelklasse baschtle mit vyyl Fantasie wunderschöni Goschdym und Wääge mit Theme wie: Winzer, Waldarbeiter, Chineese u.v.a.m.
Das Fescht loggt jewyle iber 20‘000 Bsuecher aa und bietet in iber 20 offene Källereie d Meegligkait zem gmietlig zämmesitze und d Wyy us em Lavaux zprobiere.
Dr Umzug am Sunntignoomidaag isch in däm Joor musikalisch ebbe vo uns beglaitet worde. D Rumpel Clique het scho vor 5 und 10 Joor in Lutry mitgmacht, domools versterggt dur ai Wettstaipfyffer und ainige Pfyffer und Dambuure vom Dupf Club. In däm Joor het d Angelina vo de Birli unseri Dailnaam meeglig gmacht. Ebefalls isch no e Pfyffer- und Dambuuregrubbe „Le Collège de Lausanne“ und e wälschi Guggemuusig mitgloffe.
Am Samschtig am Sächsi sinn mir, wägen ere Motorepanne an aim vo de baide Bus halt ebbe 2 Stund verspöötet, mit em en Apéro vor em Gschäft vo dr Angelina uff em Place du Bourg in das gmietlige Wuchenänd gstartet.
S Angelina und ihri Schweschter Loly hänn 5 Disch mit Bligg uff dr See schön dekoriert uffgstellt gha. Nonem erschte Apéro sinn mir e Runde go Gässle durch hischtorisch schmali Strössli no us em Mittelalter. Zem Nachtässe sinn mir vo dr Familie vo dr Angelina mit em e Raclette und vyyl Wysse verwöönt worde und so gsterggt go Gässle. Bim Halt im Schloss sinn mir spontan vom Syndic zuen ere Runde yyglaade worde. Zue verschiidene Zyte zwüsche Mitternacht und Vieri am Morge sinn mir ins Hotel Lavaux in Cully go schloofe.
Am Sunntigmorge sinn mir während em Apéro vor em Gschäft vo dr Angelina iberrascht worde mit em e Ständeli vo dr Formation „Le Collège de Lausanne“. Das sinn jungi Lüüt wo sehr präzis militärisch pfyffe und drummle. Mir hänn denne spontan mit ihne zämme dr Arabi und dr Yankee gspiilt, dirigiert vom Chef vo de Lausanner. Zem Midaagässe het uns s Nochber-Reschtorant vo dr Angelina, s „Café de la Poste“ feyni Eglifilets serviert.
Am Drey isch denn dr Umzug gstartet umsäumt vo vyyle, vyyle Lüt. D Route isch zerscht em See entlang und denne dur die hischtorischi schmali Hauptstrooss vom Stedtli zrugg zem Uusgangspunggt verloffe und het zwai Mool miesse abgloffe wärde.
Z erwääne wär no ass dr Erlös us däm Fescht dr Feriekolonie vo dr Gmaind zguet kunnt fir s Feriechalet am Col des Mosses.