Samschtig, 21. Sebdämber 2019, 18.45h, Besammlig zem Ständeli
E Dail vo unsere Knorzi hänn is 1969 mit de Eltere und em Knorzivorstand verloo und kenne jetzt 50 Joor speeter e halbs Joorhundert Basler Rolli fyyre. Dr Vorstand vo de Rolli hett sich dra erinneret wohär sii kemme und d Wettstai zem e Ständeli mit Apèro in s Zic Zac yyglaade. Droffe hänn mr is by dr Dramhaltstell Morgaarte-ring und sinn denn bym Verkehrsgaarte yygstande.
Mit em z Basel am mym Rhy sinn mir in dr Gaartewirtschaft vom Zic Zac yygloffe und vo de Basler Rolli
empfange woorde! Denn hett dr Thomas als Ständeli dr Yankee aagsait, bivoor dr Pius als Stammobmaa sich fir d Yylaadig bedanggt hett.
Bym Dangg isch s aber nit blyybe. Dr Pius hett no im Archiv graabe. Uus eme seer emozioonale Schriftstigg vo dr Wettstai an die abtrünnige hittige Basler Rolli hett är zer allgemaine Beluschtigung vorglääse.
Aaschliessend hett dr Pius em Obmaa vo de Basler Rolli e Helge vom Thomas Schürch ibergää. Me gseet deert druff, wie d Mamme Wettstai das Buscheli Basler Rolli im Kinderwaage in d Sälbschtständigkait entlosst.
Zem Abschluss hänn mr no dr Wettstaimarsch zelebriert und denn dr Apéro gnosse.
Dr Oobe isch mit ere glaine Dambuuremarschiebig vom Määrtblatz zem Spaalebäärg im Spärber haiter uusglunge.
