Am Samschtig, 24. Auguscht 2019, 07.30h, isch dr Dräffpunggt zer Besammlig bym Bushalt an dr Meeret Oppenheim Strooss gsi.
Es isch de dr Rumpel Clique 1923 iire Uusfluug uff s Rütli aagstande.
Vo Basel isch dr Bus zerscht uff Sempach gfaare zem Bsuech vo dr Schlachtkapälle.
D Schlacht by Sempach hett am 09. Juli 1386 stattgfunde. Es isch die entschaidendi Schlacht im Sempachergrieg (1385-1389) zwüsche dr sich entwiggelnde Eidgenos-seschaft und em Herzogtum Eeschtryych gsi. D Schlacht by Sempach gilt in dr Schwiizergschicht als Höhepunggt vo de Konfliggt zwische de Habsburger und de Eidgenosse. Dr Sieg vom eidgenössische Bündnis hett zer Feschtigung vo dr Eidge-nosseschaft und zem Zämmebruch vo dr Macht vom Huus Habsburg in de habs-burgische Vorlande gfiert. Das isch vo de Städt Luzärn, Bärn und Solothurn zer Erwyyterig vo iirem Territorium gnutzt woorde. Die Schlacht isch Schauplatz vo dr ab em 16. Joorhundert noochwyysbare Heldelegände vom Arnold Winkelried gsi.
Vo Sempach isch isch d Faart wyters no Luzärn zem Nölliduurm gange.
Dä Duurm isch, als e Dail vo dr Muuseggmuure, diräggt am Reussufer als rundi Stai-bosse im Joor 1513 baut woorde. Dr Stroossedurchbruch isch 1901 gschaffe woor-de. Dä massig Duurm hett e heechi vo 28m. Vor em Nölliduurm isch scho e Door-duurm gstande. Dr Nölliduurm isch d Haimstatt vo dr Safranzumpft, in iim befindet sich Zumpftstuube und s Archiv. Ze de Duurmfänschter uuse hett me e scheene Rundbligg uff Luzärn u.a. mit em Chateau Gütsch. Entlang dr Stadtmuure Muusegg hett s no wyteri Düürm mit de Nämme Lueginsland- und Zytduurm usw.
Vom Nölliduurm hänn mr is zem Mittagsässe in s Zumpfthuus ze Pfingstern ver-schoobe. Vo däm Zumpfthuus mit dr rychhaaaltige Fasaademoolerei hett me e scheene Bligg uff Kapellbrugg und uff d Jesuitekirche.
Vo Luzärn isch me em hittige Daagesziil by dr Bäärgstazioon vo dr Standseilbaan Treib-Seelisberg neecher ko und doch isch es no z Fuess e gueti Stund e Wan-derwääg ab zer Rütliwiise gange.
S isch nit genau bikannt ze wellere Zyt und uff welli Wyys d Verdrätter vo Uri, Schwyz und Unterwalden dr Bystandspaggt besiiglet hänn. E Rütli, allerdings am Mythen, wiird erscht 1307 erwäänt. Drotzdäm gilt s Rütli als Wiege vo dr Schwiiz und die eppe fümpf Heggtaare goossi Matte hett d Aigenaart vom e Nazioonal-dänggmool. Drmit wiird s Rütli, s alte Symbol fir d Grindig vo dr alte Eidgenos-seschaft, zwelf Joor no em Sonderbundsgrieg zem Woorzaiche vom nei entstan-dene liberale Bundesstaat. Dass d Beditig und Bekannthait vom Rütli iber d Schwiiz uuse längt, zaig e nääbe de internazioonaale Bsuecher au die vyyle kulturelle Uusenanderzettzige mit em Rütli, vom Friedrich Schiller iber d Quenn Victoria bis zem Marc Twain.
In däre Tradizioon vom nazioonale Symbol hett am 25. Juli 1940 dur e General Henri Guisan dr Rütlirapport stattgfunde. Fir d Rumpel Clique 1923 isch d Rütlifaart au zer Dradizioon woorde.
Vom Rütli isch s per Schiff uff Fluelen. Deert am Bahnhoofblatz hett me Kunscht bestuunt, bivoor me denn mit em Car uff Basel zrugg isch.
