Am Samschtig, 12. Oggdoober 2019, 13.00h hänn sich am Bad, Bhf. e baar Alt-gardischte, ainigi Neirumpler und ai Originaalrumpler besammlet. Mit eme Glaicar isch es iber d Gränze in s Baadische z Weil am Rhy uff d A5 und bym Autibaangryz iber d A98 in s Wiesedaal an Lörrach und Schopfheim verbyy no Hasel in d Gaarte-wirtschaft Hirsch-Stüble. Do hänn mr lang uff s Flüssige gwaardet und denn laider s Bstellte schnäll miesse aabeleere.
Vom Hirsch-Stüble Gaartebaizli isch s an dr Fyyrweer verbyy zem Yygang vo dr Erd-smannhöhle. Döört hänn mr erfaare was Stalaktite (aabehängendi-) und Stalag-mite (uffstyygendi Dropfstai) sinn. Die Hööli isch am südlige Dorfuusgang vo Hasel im Gebirgszuug vom Dinkelberg.
Dr Aafang vo dr Dropfstaibildig in dr Ärdsmannhööli hänn Höölekundler uff s Ändi vo dr Riss-Kaltzyt vor ca. 125’00 Joor dadiert. Die bis vermässeni Gsamtlängi vo de Höölegäng bedrait mee als 2’350m. Das komplexi Höölesystem hett e Nord-Süd-uusdeenig vo ca. 370m und e Oscht-Weschtuusdeenig vo ca. 126m mit eme Hö-cheunterschiid vo 24m. Dr Namme vo dr Hööli kunnt vonere Saag. No däre friener Äärdmännli (Zwäärge) dinn gwoont hänn. Die erschti schriftligi Erwäänig stammt uus dr Mitti vo de 1750-ziger Joor.
Wiider am Daagesliecht hänn sich die Maischte an dr Sunne uffgwäärmt oder em Hööli-Bistro e Käffeli gno. Derno sinn die wo z Fuess hänn mööge uff Wehr gwan-deret. An dr Strooss em nordöschtlige Dail vo Wehr sinn mr per Minicar wyters zem Textilmuseum vo dr Wääberei Brennet AG z Wehr gfaare.
Döört aakoo isch zerscht e glaine Vesper yygnoo woorde.
Derno sinn mr in Gnuss vonere Fierig dur d Frau Inge Hemberger, im viergschos-sige eemoolig Laborantehuus, wo in e Teytilmuseum umgwandlet woorde isch, koo.
S Areal vo dr Brennet AG isch für d Gschicht vo dr Industriealisierig vo Südbaade vo Bedütig. Do isch sich syt em Mittelalter e Yysehammer bzw. Hammerwärgg gsi, wo 1863 hett miesse zue mache, will s nümme konkurränzfääig gsi isch. In de Gebäulig-kaite vom Joor vo dr Schliessig hett sich e Wääberei mit mechaa-nische Wäbstiel aa-gsiidlet. Die isch 1888 in s Bsitz vo dr im Joor 1881 gründete mechaanischi Bunt-wääberei Brennet AG im Wehrer Stadtdail Öflingen übergange. Drmit hett d Tex-tilindustrie die doomools am Hoochrhy dratizioonelli Yysehärstellig abglööst und d Industriealisierig vo Südbaade voraadriebe.
Im scho erwäänte eemoolig Laborantehuus isch uff 4 Stoggwärgg d Gschicht vo dr Brennet AG syt em 19. Joorhundert im Zämmehang mit dr Entwigglig vo dr südbaa-dische Textilindustrie doggumentiert. Jedere vo de vier Generazioone vo dr Unter-nämmerfamilie Denk, in däre sich s Textilmuseum befindet isch e Stoggwärgg gwidmet. Wyteri interessanti Infos findsch unter däm Lingg do > > https://de.wikipedia.org/wiki/Textilmuseum_der_Brennet.
Vo Wehr hett is denn d Chauffeuse Renate sicher uff Bad Säckingen an Rand vo dr Fuessgängerzoone, bym Schloss Schönau mit em Drummpeter vo Sägginge im Gaarte, gfaare. Vo döört sinn s e baar Schritt dur d Altstadt, in s le Jardin vom Hotel Goldener Knopf, zem Apéro gsi. Im e Saal mit eme Stainway-Flügel hänn mr e Viergänger uffdischt griegt. Zem Ärger vom Baizer hett dr Megge vor em Dessert no in Taschte glängt und is unterhalte.
Noch däm wunderbare Znacht sinn mr mit em Minicar vo Säckingen über e Rhy no Stein und z Eiken uff d Autibaan no Basel an Bad. Bhf. gfaare woorde. Die wo no Durscht ka hänn sinn im Schiefe Egg no yykeert und für e harte Käärn hetts im Alte Schluuch no e Schlummerdrung gää.
Em Obmaa Peter e groosse Dangg für d Organisazioon vo däm vyylsytige wunderbare Herbschtbummel. S isch Diggi Boscht – s isch Wettstai Boscht gsi.