Herbschtbummel 2016

Herbschtbummel vom 24. Sebdämber 2016 
herbst
Dr Dräffpunggt isch am 13.30h bym Carhaltblatz an dr Gaartestrooss gsi. Vo deert isch me mit em Vögtli Carraise uff d Autibaan A2, um by dr Uusfaart Lieschtel uff die neyi Rhystrooss A22 yyzbiege. In Lieschtel Altmarkt het me au d A22 verloo und isch in s Fränggedaal yybooge, um iiber Waldenburg-Langenbruck uff Bärenwil z faare. Im Reschtorant Chirchli hett s in dr Gaartewirtschaft by scheenschtem Spootsummerwätter en Apéro mit Spägg-Gugelhopf vom Obmaa Peter Meyer offeriert gä.

No em Apéro isch dr Car iiber d Santelhöchi und vo deert via Egerkingen, Hägendorf uff Kappel zem Grundwasserbumpwärgg Zelgli vom Zwäggverband Wasserversoorgig Untergäu und dr Wasserversoorgig Hägendorf gfaare.

Vo däm Grundwasserpumpwärgg (PW) Zelgli wärde 5 Gmainde versorgt. Betailigt isch je hälftig d Wasserversoorgig (WV) vo dr Yywohnergmaind Hägendorf im Juragäu und dr Zwäggverband Wasserversoorgig Untergäu (ZVWV). Zem ZVWV Untergäu ghöre d Bürgergmainde Boningen im Aaregäu, Gunzgen und Härkingen sowie d Yywohnergmaind Kappel im Mittelgäu. Baidi Wasserversoorgige hänn vom Staat Solothurn e Entnaamekonzession vo je 4’000l/min (meegligi max. Entnahm 15’000l/min). Vo däm PW Zelgli wäärde zer Zyt um die 10’000 Yywohner versoorgt. Will s Grundwasser im Mittelgäu e sehr e gringi Ärdryychüberdeggig vo nur ca. 2.00m bis 3.00m het, isch do für d Grundwasserentnaam e Horizontalfilterbrunneaalaag gwäält worde. Iiber dr Bau, Betrieb und Unterhalt hänn dr Ruedi Studer, Bürgergmaindpresidänt und Altbrunnmaischter Hägendorf und dr Altgardischt Ruedi Hintermann (ehemoolige Bauverwalter z Hägendorf) informiert. Do e baar Impressioone ze däm Bumpwärgg:

Vom Bumpwäärg Zelgli isch me wyters zer Husmatte im Gnöd zem Quellwasseruffberaitig vo dr WV Hägendorf go aaluege. S Quellgebiet isch 1896 vo Olte mit 15 Quellfassige erschlosse woorde und foot öschtlig vo Bärenwil an dr Kantonsgränze zem Baselbiet aa und längt dief in d Tüfelsschlucht. Die heggscht und wytischt  gläägeni Fassig isch d Bärenwilerquelle mit eme 11m diefe gmuurte Schacht. S Queellaitigsnetz het bis zem Rohwasserbeggi e Längi vo iiber 4,5km! Do in dr Quellwasseruffberaitig wiird s rohe Quellwasser zerscht gfloggt, denn im e Sandfilterkessel grainigt und zem Schluss entkaimt. S Entkaime vo Dringgwasser schryybt s Schwiizerische Lääbensmittelbuech vor! No dr Entkaimig wiird s grainigte Quellwasser in s Rainwasserbeggi und vo deert iiber s Reservoir Spitzerüti in s Wasseversoorgignetz zem Abonnänt bzw. Verbruucher glaitet. Au do derzue e baar Impressioone mit eme Film vom Quellwasseryylauff:

No em Bsuech vo dr Quellwasseruffberaitig isch by däm scheene sunnige Wätter dr grösser Dail iiber dr Rinderweid und am Schützehuus verbyy in Tüfelsschlucht zem Tuffbrunne abdaucht. Dä Tuffbrunne in dr uursprünglige groossartige Form gits nümme. Dä isch im Dezämber 2010 abbroche. Zem Gliig het s nur Sachschaade und e huffe Wiiderinstandsetzigsarbete gä. Die näggschte Bilder sinn vo dr Wanderig dur Tüfelsschlucht, aber au vo de Naturschääde wo mit de Joor entstande und dur dr Verkehrs- und Verschönerigsverain Hägendorf mit vyyle freiwillige Hälffer gfliggt und instandghalte wiird. Yydrügglig au das Naturwunder Tuffbrunne mit Bilder vo vorhär, nochhär und jetzt.

Die wo nit so guet z Fuess gsi sinn, hänn mit em Car zem Dorfblatz kenne faare und scho Aine gno bis d Wandergruppe ko isch!

No em verloo vo dr nadyyrlige Tüfelsschlucht isch d Wandergruppe iiber dr Dorfblatz in die glyychnaamigi Baiz. In dr Gaartewirtschaft het dr Herbschtbummeldätschmaischter dr Apèro offeriert. Aaschliessend het me im innere vom Gotthard* e feyns Nachtässe gnosse (*Die Yyhaimische saage däre Baiz Gotthard, will dr frienerigi Baizer Rötheli e so zem Vornamme ghaisse het).
No em Nachtässe het dr niggi Schöllkopf no uff das am 28. Oggdoober 2016 zem 50-zigste Mool stattfindende Dambuuremaioormääli hiigwyyse. Es soll e Riisezuug d Stadt ab gä!
Denn isch s mit em Car wiider zrugg uff die anderi Syte vom Bäärg no Basel gange. Deert hänn no e baar dä Herbschtbummel im Glaibasel uusgling losse. Do die letschte Impressione: