Wohär kemme und wär sinn mir?
D Wettstai-Clique isch kurz no dr Fasnacht am 18. Abrille 1952 im Sääli vom Reschtorant zem Gifthüttli vo abgsprungene junge Lälli gründet woorde. Wettstai, wel doomools zaalryychi Jugendligi no im Glaibasel gwoont hänn. Au dr legendäri Johann Rudolf Wettstai isch by dr Nammensgäbig mit sym Wirgge fir d Stadt im Vordergrund gstande. Rasch het sich d Wettstai-Clique zenere allsyts anerkannte Stamm-Clique entwigglet. Sogar dr Kischtlivater Noldi Schneider het me kenne überzüge, dass au d Waisebuebe jetzt zer Wettstai in d Drummel- und Pfyfferschuel selle ko.
Im Joor 1962 sinn d Wettstai- Knorzi gründet woorde. Dr Überdritt in Stamm wiird mit em 18. Lääbensjoor vollzooge.
Die Junge vo 1952 sinn elter woorde. Fimf hänn sich an ere Sitzig im Rhyfälderhoof am 4. Oggdoober 1988 entschiide dr Cortège gmietliger aazgoo. Drum hänn si denne d Wettstai Alti Garde mit em Namme „Gniembbi“ gründet. E so sinn am Morgestraich vom 13. Hornig 1989 vierzää Wettstai- Gniembbi abmarschbereit yygstande.
Dr Namme und Zwägg vo dr Glygge sinn in Richtlinie feschtghalte. D Grundlaag ze de Richtlinie bilde d Statute vom Stammverain. Entsprächend däne findet als oberschts Organ d Generalversammlig statt. D Uusnaam bildet die 10. Uusgoob; die isch mit eme Ständeli vo dr Stammglygge und eme Banggett umraamt woorde.
An dr 12. Generalversammlig isch uff Wuntsch vo dr Meerhait vo de Aggtivmitgliider dr Namme Wettstai Gniembbi begraabe und in „Wettstai Clique Alti Garde“ umgwandlet woorde. Uus de aafänglig 14 Aggtivi sinn zwischezytlig 44 woorde. An dr 6. Glygge- Fasnacht het s erscht Mool die doomooligi Pfyfferinstruggtere deerfe mitdrampe. Inzwiische het sich d Zaal vo de wyyblige Mitgliider erhööt. Do d Mitgliiderzaal vo de Dambuure uus verschiidene Gründ bis uff 4 gschrumpft isch, het me im Joor 2011 versuechswys am Morgestraich und Mittwuchoobe mit dr Rumpel Clique 1923 zämme gässlet.
Das het ab em Joor 2012 zenere Glygge- Partnerschaft gfiert. Drum macht me sythäär mit dr Rumpel Clique 1923 und de letschte Glieebiire mit em glyyche Sujet, vorläufig 2 Ladäärne und 2 Dambuurmaioore sowie aim Requisit zämme Fasnacht. Das het an dr Fasnacht 2014 e stattlige Zuug vo 66 Aggtive ergää. Am 20. Sebdämber 2013 het me zämme mit de Glygge-Partner de letschte Glieebiire und dr Rumpel Clique 1923 im Saal vo dr Saffrezumpft zwai Juubilee gfyyrt. D Wettstai Clique Alti Garde isch 25 Joor und d Rumpel Clique 1923 isch 90 Joor alt woorde.
Mit eme Partnerschafts- Pin, eme Banggett und Juubel- Ball isch das Jubileeum entsprächend gwürdiget woorde.
Es hätt no Blatz in däm glatte Huffe!
Also kumm und syg au derbyy. <will das nit glappt hett, stellt sich d Froog>
Wo aane goots mit dr Alte Garde?
E glaine Ruggbligg und Zuekumpftsvoorstellige vom Oobmaa Peter Meyer in de Schryybe an Obmaa Pius Keller vom Stammverain
vom Novämber 2019
Brief Nov. 2019 WAG an Stamm
und Januar 2020
Brief Jan. 2020 WAG an Stamm
Am 18
.Juni 2020 hänn an dr Generaalversammlig die stimmberächtigte Aggtivmitgliider meerhaitlig dr Uusdritt uus dr Wettstai Alte Garde gää!
Die erwaarte jetzt d Uffnaam by dr Rumpel Clique 1923 an dr Daagig vom 05. Sebdämber 2020.
Wie scho by dr Agända erwäänt, het d Fasnacht 2020 wäge dr Corona Pandemie nit stattgfunde!
In weller Form das Gfäss WAG in Zuekumpft wyter verwändet wiird, isch im Stammverain üerbloo. Sicher isch nur no, dass dr Verantwoortligi für d Hompage vo dr Alte Garde, drotz em Rugg- oder Überdritt in Stamm, d Chronik bis zem bittere Ändi vo dr Wettstai Alti Garde digitalisiere wiird.
Neus
Dr Stamm het an dr Fasnacht 2020 welle e Pilot-Versuech mit dr Neue Alte Garde (NAG) durefiere. S Süüschee het „Alt halt“ ghaisse. Es isch nit zem Pilot koo, will d Corona Pandemie wäärend 2 Joor d Fasnacht uusbrämst het.
Em 2022 het d Frau Fasnacht sich, allerdings ooni Cortège und laider au ooni Wäägeler, seer wild bemerggbar gmacht! Die Junge vom Stamm hänn kuurzfrischtig e Charivarizuug uff d Bai gstellt. Mr sinn mit roote draagbare Stiel underwägs gsii. Dr Pascal het em letschte Momänt no e Ladäärne aanebrocht, wo uus Virephünggtli s Bööse und s Guete dargstellt het!
Em 2023 und 2024 sinn mr denn mit de Süüschee „Alti wyssi Männer“ und „K(A)I Angscht“ wiider oordeli normaal uff d Gass!
An dr Lämbbesitzig 2024 hets in Sache NAG wiider Bewegig gää. Dr Thomas Brüderlin und Sandra Widmer hänn daas Thema wiider in s Gsprööch brocht. Dr Thomas het drno die Yylaadig NAG verschiggt.
Am 11. Abrille 2024 hänn denn dr Thomas Brüderlin und Sandra Widmer gründlig über die neu dritt Wettstai Ainhait im Reschtaurant Leuezorn orientiert. Für d Nammensgääbig isch demoggratisch abgstimmt woorde. S Resultaat het ergää, dass mr jetzt dä Nämme wänn:
Gniembbi
Es isch aigentlig kai neue Namme, wills dä scho by dr erschte Gründig anno 1988 gää het.
Uff em Thomas Schürch sym Gründigsdoggumänt hänn alli Aawääsende unterschryybe Gniembbi Gründig! Dr Thomas het dr Uffdraag gfasst e neus Gniembbi-Embleem ooni Hailigeschyyn zschaffe.