Ladäärnevernissage 2017

Ladäärnevernissage Nr. 1
Sunntig, 5. Meerze 2017


Das Joor isch s noonemol nit wie allewyyl. Glyych wie s letscht Joor isch no, dass die Alti Garde zämme mit de Partner nur no ai Ladäärne – nämmlig s Gstell vo dr Rum- pler-Ladäärne – het. Au drifft me sich wiider zer Ladäärnevernissage Nr. 1 am Sunntig, 5. Meerze 2017, 16.00h zerscht im Hööfli vo dr Rumpelstuube. D Ob- manne dr Martin Cron für d Rumpel Clique 1923 und dr Peter Meyer Wett- stai Clique Alti Garde hänn d Vernissage mit dr Begriessig eröffnet. Neu und fründschaftlig isch gsii, dass dr Obmaa Peter als Nitrumpler zerscht greedet und am Schluss em Martin dr Stägge und drmit au s Zepter für d Fasnacht übergää het!

Will dr Zeedeldichter Peter Habicht brueflig unabkömmlig gsii isch, het dr Fritz Peter Staehelin dr Zeedel vorglääse!

Derno het dr Martin em Peter für d Spendierig vom Apéro danggt. Es het Wysse und Sunne-reedli gää, dass aber d Sunnereedli au in dr Apérospänd yybezoo- ge sinn, het dr Peter erscht jetzt vom Martin erfaare. Mit em bikannte Ritual isch die „Diggi Boscht“ singend und klatschend verdanggt woorde! Zem Schluss wär jetzt d Enthüllig vom Luca Vicente sym Erschtlingswärgg dra gsii! Do aber d Ladäärne no nit verhüllt gsii isch, het dr Martin dr Luca uffgfordert z erglääre, was är bym entstoo vo dr Ladäärne sich uusdänggt het. Das isch vom Luca sehr humorvoll und ungwöhnlig gmaischderet woorde, indäm är mit synere Lambbe- vorstellig hinde bym Dangg aagfange het. Bevoor är an Aafang zer Begriessig ko isch, het är im Mitteldail im bsundere uff d Faarb uff merggsam gmacht, wo am Morgestraich und z Nacht dur s hinderlüchte nümme gooldig,  sondern dräg- gig isch. Das het mit em Koo-Ni-Hau z due, wo als Pontifex oder Verdrätter Kurt uff Äärde uff dr Vordersyte dää dräg- gig Fätze uus em Boode zieht. By dr Hindersyte gseet me, dass die mit em Koo-Ni-Hau und syne Gstalte Truk, Kürt und Oh-Kurt nit so stabil isch. Sii isch am wangge und kurz vor em zämmestürze, aber sii stoot no, will emänd sich ain am Kaffi Lutz hebt, was mit em Zeedel z due het!

D Robin vo de letschte Glieebiire het die Aawääsende mit Wyssem und Sunne- reedli beschtens bedient. Derno hänn d Pfyffer mit em Ohremyygeli iire groosse Uffdritt ka. Dä neu yygiebti Marsch isch s erschtmool mit vyyl Häärzboppere vor so vyyl Publikum pfyffe woorde.

No däre Premiere isch d Ladäärne demontiert, u.a. dur d Ladäärnezieer dur e Durchgang an d Schnyydergass drait und wiider uffbaut woorde.

Yypfyffe het me d Ladäärne ab dr Schnyydergass via Määrtblatz über die Mitt- leri Brugg mit eme Zwüschehalt bym Merian an dr Rhygass und het se denn zer Wettstaifamilie bym Waisehuus pfyffe.



Ladäärnevernissage Nr. 2

D Ladäärnevernissage Nr. 2 het im Grais vo dr ganze Wettstai wie allewyyl im Hoof vom Waisehuus stattgfunde. Die Neustämmige hänn wiider d Määlsuppe gschöpft und d Gedrängg uusegää. Dr Stammobmaa Pius Keller het denn uff ere Laitere oobe begriesst und dur d MoolerLadäärne vorstelle losse. S dreier Dreamteam, wo jetzt scho die fümpfti Ladäärne für d Knorzi gmoolt het, isch allewyyl noonig gsprööchig und nur ze Zwait do gsii. D Knorzi spiile s Sujet „Generazioone Sofa – ab uff s Sofa! und wenn kunnsch (ze uns) in d Gäng? “ uus.

Die Alti Garde goot mit em Sujet „KULT! E langi Gschicht …/ Asnacht 3017 (sic)“ uff e Cortège. Dr Uffhänger ze däm Sujet isch no em Herbschtbummel entstande. Denn het dr Megge Hofmann syni Froog „Was macht dr Kurt im Dreier“ an dr Drämmlihaltstell am Aeschblatz gstellt, wo är dr Kurt Keller im Dreier abfaare seet. Dr Megge het au d „Faggte-Hypodeese-Speggulazioone“ als Zytrais in Zuekumpft vo 2017 bis 3017 oder (503 no Kurt) uff dr Zeedelruggsyte verfasst. (Dr Zeedel und em Megge sy Zytrais kasch im Byydraag Sujet- oder Fasnachtssitzig entnää bzw. aaloose!)

Dr Thomas Schürch stellt als Letschte d Stammladäärne vor. Är und dr Karli Merz hänn die Lambbe zämme gmoolt zem Sujet „GRYZ-um-ZUG“! Gmaint drmit isch d „Schwiizer und Schotte dusche s Staatsgebiet“. Dr Stamm maint das isch „die perfäggt Leesig nach Brexit“!

No dr Vernissage sinn alli drei Ladäärne via Rääbgass, Clarablatz, Gryffegass iiber d Brugg, dur d Yssegass, Määrtblatz, Gäärbergass zer Boscht pfyffe woorde. OoniLadäärne isch me mit em Baslermarsch vor s Stammlokaal bis zem Stadtkäller pfyffe.