Em Hans-Joggi Henn sy Fescht


S Feschtzält, wo dr Wasserfahrverain Horburg in ere Win-Win-Situazioon zer Verfiegig gstellt und d Gäscht bewirtet het, fillt sich langsam.

Derno ereffnet dr Obmaa vo dr Wettstai Clique 1952 s Fescht, wo dr Joggi in sym Teschtamänt feschtgschryybe het. Yyglaade sinn dr Erleverain Basel, s Spiil vo de drei Eeregsellschafte vom Glaibasel, die Alti Garde vo dr Olympia und dr Wettstai Stamm, wo allne e groosszigs Legat vom Joggi vermacht woorde isch!

Als erschte Feschtredner het dr Wettstai Clique Uurvatter Niggi Schoellkopf e baar Reminiszänse vom Joggi sym Glyggelääbe verzellt. Als dr groossi Blondi isch är als groossartige Vordrääbler mit syne uusgfallene Idee für d Requisyte an dr Fasnacht und de Spassyylaage am Bummel sowie im Stadtkäller uffgfalle. Vorallem dr Wirts-frau Josefine Schwarzwälder vom Stadtkäller het är s bsunders aadoo! Do sinn die Gschichte mit zirkulierende ca. 5 Liter fassende Bierhumpe, wo zem abruume vom Stammdisch mit em Studäntelied ” hebt an das Ding da” gfiert het und schlussänd-lig dä Disch mit de Bai voruus im Plafond gsteggt isch. Fascht zenere Stammdisch-kindigung isch s wääge sällem Donnschtigoobe ko, wo d Frau Schwarzwälder in s Kino yyglaade gsii isch. No däm me gmerggt het, dass s Olgeli – d Schweschter vo dr Wirtin – ellai isch, het dr Joggi s Zaiche zem Agriff gää! Die alti Typpregistrierkasse an dr Egge vom Buffet isch dra ko. Jede wo deert dure uff s WC het miesse, het e Bedraag in d Kasse typpt. S Olgeli und die zwaiti Serviceaagstellti hänn d Auge verdillt und sinn fascht in Ohnmacht gfalle und alles bättle uffzheere het nüt gnützt. Am andere Daag het denn dr Niggi miesse by dr Frau Schwarzwälder aasuuge, do s Personaal nit het kenne abrächne, will bym Yynaamesoll iiber e Mylioon Frangge aazaigt gsii isch! Mit ere Druurmiene und eme Bluemestruus het sich dr Niggi entschuldigend vernaigt und dr Frau Schwarzwälder versprooche dr “Groossi Blondi” besser im Griff z haa, sodass das nimme sott bassiere!
Zem Schluss het dr Niggi e Gruess an Joggi em Bruno Vetter iibergää. Dä Gruess isch am e roote und wysse Baloon aabunde gsii, zem en in Himmel neecher zem Joggi kenne z schigge!

Aaschliessend isch s Buffeet ereffnet woorde, wo d Fraue vom Wasserfahrver-ain Horburg die verschiidene Salaat seer liebevoll uff e Däller gschepft hänn. By de baide Grill usserhalb vom Feschtzält het me sich fir e Wurscht oder e Schnitzel entschaide kenne. No em Hauptgang sinn d Jeisi Migger 1926 yymarschiert und hänn e Supersession uffgfiert.

No de Jeisi Migger 1926 isch dr Urs Schwald vo dr Olympia Alti Garde an s Mikrofoon drätte. Är het dr Hans-Joggi Henn in ere yydrigglige und noochdänglige Reed geert!

Zem Dessert hänn d Jeisi Migger 1926 noonemool uffgspiilt.

Zem Schluss vo däm pfundige Fescht hänn ebe 150 Lyt uff e Hans-Joggi Henn noonemool aagstoosse. Dr Urs Schwald het das zwar scho in synere Reed gmacht. Drotzdäm meecht y als Schryyber vo dr WAG s nit unterloo de Organisatoore häärzlig z dannge, wo mit däm Aaloss em Hans-Joggi sy letschte Wuntsch so fantastisch umgsetzt hänn!